പുതിയ തലമുറ സിനിമകളുടെ കുത്തൊഴുക്കാണല്ലോ ഇപ്പോള് നമ്മള് കണ്ടുകൊണ്ടിരിക്കുന്നത് .എല്ലാവരും ന്യൂ ജനറേഷന് ആകാനുള്ള പുറപ്പാടിലാണ് .അത് പ്രതീക്ഷിച്ചാണ് ലാല് ജോസിന്റെ പുതിയ സിനിമയും കാണാന് പോയത് .എന്നാല് ലാല് ജോസിനു ഒരുമാറ്റവും ഇല്ല എന്ന് സിനിമ കണ്ടപ്പോള് മനസിലായി .വളരെ ചെറിയ ഒരു കഥ വളരെ നന്നായി പറഞ്ഞിരിക്കുന്നു .
സിനിമയുടെ പ്രമേയം ഡോക്ടര്മാരും രോഗികളും തമ്മിലുള്ള ബന്ധം ആണ്.ഒരു അപകടത്തില് പെട്ട് ചെല്ലുമ്പോള് ഡോക്ടര്മാരെ നമ്മള് ദൈവത്തിനൊപ്പം കാണുന്നു .എന്നാല് ചെറിയ ഒരു പിഴവ് പോലും അവരുടെ
ഭാഗത്ത് നിന്നുണ്ടാകുമ്പോള് നമ്മള് അവരെ അവിടെനിന്നു വലിച്ചു താഴെ നിലത്തിട്ടു ചവിട്ടുന്നു .അവരും മനുഷ്യരാണ് എന്ന കാര്യം നമ്മള് മറന്നു പോകുന്നു .അവര്ക്കും നമ്മളെപ്പോലെ കുടുംബവും കുട്ടികളും ഉണ്ട് എന്നുപോലും നമ്മള് ചിന്തിക്കുന്നില്ല .അവരുടെ വരുമാനം മാത്രമേ നമ്മള് കണക്കാക്കുന്നുള്ളൂ .കുറച്ചു ഡോക്ടര്മാരുടെ ജീവിത കഥയാണ് ചിത്രം പറഞ്ഞു പോകുന്നത് .
രവി തരകന് എന്ന ഡോക്ടര് ആയി പ്രിഥ്വിരാജ് എത്തുന്നു .അദ്ദേഹം സ്വന്തം റിസ്കില് ചെയ്യുന്ന ഒരു ശസ്ത്രക്രിയ പരാജയപ്പെട്ടു രോഗി മരിക്കുന്നതില് നിന്നാണ് കഥയുടെ തുടക്കം .പിന്നീട് ചില ഫ്ലാഷ് ബാക്കുകളിലൂടെയാണ് ബാക്കി കഥ പറഞ്ഞു പോകുന്നത് .രവിതരകന്റെ ജീവിതം പിന്നീട് ചിലരിലൂടെ പ്രേക്ഷരിലേക്ക് എത്തുകയാണ് .
രവിതരക്നും വിവേകും (നരേയ്ന് )ഒരേ കോളേജില് പഠിക്കുന്ന MBBS വിദ്യാര്ഥികള് ആണ് .രസകരമായ ക്യാമ്പസ് ജീവിതം .ഇടയ്ക്കു കടന്നു വരുന്ന പ്രണയം .പഠിക്കാന് മിടുക്കരായതുകൊണ്ട് 7 വര്ഷം എടുത്തു രണ്ടു പേരും പാസ്സാകുന്നു.പിന്നെ രണ്ടു വര്ഷം വരുന്ന ഗ്രാമീണ സേവനം ഒരു പ്രശ്നം ആകുന്നു .
മനസില്ലാ മനസോടെ മുന്നാറിലെ ഒരു ആശുപത്രിയില് രവി തരകന് എത്തിച്ചേരുന്നു .അവിടെ വച്ച് അയാള് ഡോക്ടര് സാമുവലിനെ കണ്ടുമുട്ടുന്നു .പ്രതാപ് പോത്തന് ആണ് ഡോക്ടര് സാമുവലിനെ അവതരിപ്പിക്കുന്നത് .
ഡോക്ടര് സാമുവലിന് നിന്ന് രവിതരകന് ജീവിതം പഠിക്കുന്നു .അയാളുടെ ഭാഷയില് പറഞ്ഞാല് ഡോക്ടര് രവിതരകന് ജനിക്കുന്നത് തന്നെ അവിടെ നിന്നാണ് .ഒരു ലക്ഷ്യബോധവും ഇല്ലാതിരുന്ന രവിതരകന് ജീവിത്തില് ലക്ഷ്യം ഉണ്ടാകുന്നു .അതിനിടയില് ഉണ്ടാകുന്നെ കുറെ സംഭവങ്ങള് അതാണ് ഈ സിനിമ പറയുന്നത് .
ലാല് ജോസ് എന്ന സംവിധായകന്റെ ഒരു മികച്ച സിനിമ തന്നെയാണിത് .വളരെ ചെറിയ ഒരു കഥയെ വളരെ ലളിതമായി പറഞ്ഞിരിക്കുന്നു .ന്യൂ ജനറേഷന് സിനിമകളിലെ ദ്വയാര്ഥ പദപ്രയോഗങ്ങള് ഇല്ലാതെ ,ത്രസിപ്പിക്കുന്ന സ്റ്റണ്ട് രംഗങ്ങള് ഇല്ലാതെ റൊമാന്റിക് പദപ്രയോഗങ്ങള് ഇല്ലാതെ ,എങ്ങനെ ഒരു സിനിമ വിജയിപ്പിക്കം എന്ന് ലാല് ജോസ് കാണിച്ചു തരുന്നു .എല്ലാ കഥാപാത്രങ്ങള്ക്കും യോജിച്ച നടന്മാരെയും നടിമാരെയും കണ്ടു പിടിച്ചിരിക്കുന്നു .രവിതരകന് എന്ന കഥാപാത്രത്തെ പ്രിഥ്വിരാജ് വളരെ നന്നായി അവതരിപ്പിച്ചിരിക്കുന്നു . വളരെ ഓവര് ആയിപ്പോകാവുന്ന രംഗങ്ങള് ഉണ്ടായിരുന്നിട്ടും അച്ചടക്കത്തോടെ പ്രിഥ്വി രാജ് ഇത് ചെയ്തിരിക്കുന്നു . വര്ഗം , ഇന്ത്യന് റുപീ എന്നീ ചിത്രങ്ങള്ക് ശേഷം എനിക്ക് വളരെ ഇഷ്ടപ്പെട്ട കഥാപാത്രം .മറ്റൊരു ശ്രദ്ധേയ കഥാപാത്രം ഡോക്ടര് സാമുവല് ആണ് .പ്രതാപ് പോത്തന് ഇത് വളരെ നന്നായി അവതരിപ്പിച്ചു .പക്വതയുള്ള ഒരു ഡോക്ടര് ആയി അദേഹം മാറുന്നു .നരേന് ,സംവൃത ,രമ്യ നമ്പീശന് ,റിമ കല്ലിങ്കല് ,സലിം കുമാര് എല്ലാവരും തങ്ങളുടെ റോളുകള് ഭംഗിയാക്കിയിരിക്കുന്നു .ഗാനങ്ങള് സന്ദര്ഭത്തിന് യോജിച്ചത് തന്നെ .
സിനിമ കണ്ടിറങ്ങുമ്പോള് സാധാരണയുള്ള കയ്യടികളും കൂക്കിവിളികളും ഒന്നും ഇതിന്റെ അവസാനം തിയേറ്ററില് ഉണ്ടായില്ല .എല്ലാവരും വളരെ നിശബ്ദമായി ഇറങ്ങിപ്പോകുന്നു ആദ്യമായിടന് ഇങ്ങനെ ഒരു അനുഭവം .പ്രേക്ഷക ഹൃദയത്തില് ചെറിയ പോറല് ഏല്പ്പിക്കാന് എങ്കിലും കഴിഞ്ഞാല് അതാണ് സിനിമയുടെ വിജയം .നല്ല സിനിമകള് ഇനിയും ഉണ്ടാകട്ടെ.
